Il-Knisja ta’ Ġesù Kristu tal-Qaddisin tal-Aħħar Żmien qed iżżid l-isforzi umanitarji tagħha fit- Turkija u s-Sirja hekk kif ir-reġjun ikompli jirkupra mit-terremoti qerrieda ta’ Frar.
“Hekk kif għaddejna mill-belt ta’ Antakya, bqajt mibluh bil-qirda kbira li rajt. Qisni kont qed nara xi ritratti tal-bliet ibbumbardjati fit-Tieni Gwerra Dinijia. Ħassejtni nidħol f’qoxorti,” qal W. Christopher Waddell tal-Veskovat li Jippresedi, li ricentament irritorna minn żjara ta’ jumejn ġewwa t-Turkija.
“Nistgħu ngħidu li belt ta’ 400,000 ruħ m’għadhiex teżisti,” qal l-Isqof Waddell. “Il-biċċa l-kbira tad-djar u l-fabbriki ġġarrfu. Dawk il-djar u dak il-bini li għadhom weqfin iridu jitwaqqgħu.”
Antakya hija l-kapitali tal-Provinċja ta’ Hatay fit-tramuntana tal-pajjiż qrib il-fruntiera mas-Sirja. Il-belt tilfet ukoll l-infrastruttura tagħha, inkluż l-ilma, l-elettriku, u s-sistemi tad-drenaġġ.
Wara laqgħat ma’ uffiċjali tal-Knisja mill-Ewropa u l-Afrika, l-Isqof Waddell ivvjaġġa lejn il-Lvant Nofsani ma’ martu, Carol, u rappreżentanti oħrajn mill-Knisja. Kienu t-Turkija fl-10 u l-11 ta’ Mejju, 2023, biex jeżaminaw ir-riżultati tal-assistenza umanitarja pprovduta mill-Knisja wara t-terremoti devastanti u biex jiltaqgħu ma’ uffiċjali Torok dwar sapport addizzjonali.
Sakemm dam fil-pajjiż, huwa ltaqa’ ma’ Dr Selami Kilic, id-Direttur Ġenerali għall-UE u Affarjiet Barranin fil-Ministeru tas-Saħħa Tork, u l-Awtorità fuq l-Immaniġjar ta’ Diżastri u Emerġenzi (AFAD) tat-Turkija, li għandha l-kwatieri għolja f’Ankara. Dr. Kilic esprima apprezzament sħiħ għall-assistenza tal-Knisja u qal li l-Knisja kienet waħda mill-iktar organizzazzjonijiet effiċjenti fir-rispons tagħha għat-terremoti, billi għamlet dak li qalet li se tagħmel.
“Burham Aslan and Nalan Aydin rirringrazzjaw lill-Knisja għall-għotjiet u l-għajnuna straordinarji li ġew ipprovduti permezz tal-AFAD,” żied jgħid l-Isqof Waddell. “L-iskala tal-għajnuna kienet apprezzata ħafna wkoll.”
Il-Knisja ta’ Ġesù Kristu ma tnikkritx biex tirrispondi u ħadmet ma’ numru ta’ organizzazzjonijiet ta’ solliev fiż-żona tat-terremot minn meta seħħ id-diżastru.
Matul il-ġranet li qatta’ t-Turkija, l-Isqof Waddell żar ukoll xi akkomodazzjonijiet temporanji, inkluż kamp tat-tined u kamp tal-kontejners, u klinika medika mobbli f’Payas u fabbrika tal-klinika mobbli.
Matul iż-żjara tiegħu, l-Isqof Waddell iffirma ittra ta’ donazzjoni biex jiġu pprovduti 500 akkomodazzjoni tal-kontejners għal nies spostati. Il-kontejners huma mgħammrin b’tojlit u xawer biex il-familji jkollhom iktar privatezza milli jsibu fil-kampijiet. Dawk li qed joqogħdu fit-tined ikollhom jużaw tolits u xawers komuni.
Il-Knisja qed tipprovdi wkoll kliniċi mediċi mobbli għar-reġjun. Tliet kliniċi qed joperaw diġà, u r-raba’ waħda ħa taslilhom dalwaqt. L-Isqof Waddell sar jaf ukoll bil-ħames lokalità fejn hemm il-ħtieġa ta’ klinika medika mobbli, u dan ġie approvat meta huwa rritorna pajjiżu. Il-lokalità hija r-raħal magħruf bħala Oguzeli fejn il-popolazzjoni, minn 10,000, kibret għal 70,000 bil-wasla tas-sopravissuti li waslu hemm ifittxu refuġju.
Barra minn dan kollu, il-Knisja se tgħin fl-ispejjeż tat-tiswijiet tal-isptar f’Gaziantep li sofra ħsarat bit-terremot.